ΚΟΨΙΧΟΙ. Νικόστρατος ἢ Φιλέταιρος· τί οὖν ἀγοράσω; φράζε γάρ. Β. μὴ πολυτελῶς, ἀλλὰ καθαρείως· δασύποδα, ἐὰν περιτύχῃς, ἀγόρασον καὶ νηττία ὁπόσα σὺ βούλει καὶ κίχλας καὶ κοψίχους, ὀρνιθάριά τε τῶν ἀγρίων τούτων συχνά· χάριεν γάρ. Ἀντιφάνης δὲ καὶ ΨΑΡΑΣ ἐν τοῖς βρώμασι καταλέγει· μέλι, πέρδικες, φάτται, νῆτται, χῆνες, ψᾶρες, κίττα, κολοιός, κόψιχος, ὄρτυξ, ὄρνις θήλεια. πάντων ἡμᾶς λόγον ἀπαιτεῖς καὶ οὐδʼ ὁτιοῦν ἔξεστιν εἰπεῖν ἀνυπεύθυνον. ὅτι τὸ ΣΤΡΟΥΘΑΡΙΟΝ παρʼ ἄλλοις τε καὶ δὴ καὶ παρʼ Εὐβούλῳ· περδίκια λαβὲ τέτταρʼ ἢ καὶ πέντε, δασύποδας δὲ τρεῖς, στρουθάριά θʼ οἷον ἐντραγεῖν, ἀκανθυλλίδας, καὶ βιττάκους, σπινίδια, κερχνῇδας τά τʼ ἄλλʼ ἅττʼ ἂν ἐπιτύχῃς.
|
